ريا وسكينة ( سرقة ولا نضال )
السلام عليكم
ريا وسكينة يمكن من اكتر الناس اللي اتظلموا في الاعلام واتعمل على قصتهم مسرحيات وافلام ومسلسلات وكلها بتصدر صورتهم وكأنهم قتلة وسفاحين بيخطفوا الستات من الاسواق ويقتلوهم ويسرقوا دهبهم وماعم اتنين رجالة هم عبد العال وحسب الله وان سكينة كانت ست مش كويسة ، دول حتى ليهم جناح! في القلعة في القاهرة وفيه صورتهم وحكايتهم اللي لسه كاتبها فوق دي وحتى جايبين صورهم وهم مشنوقين !!!
اي ده هو كان في شنق للستات ؟؟ اه ماهو علشان خاطرهم القانون اتعدل وكانوا اول سيدتان يتحكم عليهم بالاعدام شنقا !!!
طب اي حكايتهم بقى ؟؟! تعالوا نشوف الموضوع من وجهة نظر تانية ،،
ريا وسكينة علي همام من صعيد مصر انتقلوا الي الاسكندرية وسكنوا في حي اللبان في بدايات القرن العشرين في بداية عشرينيات القرن الماضي كان فيه انتفاضات و تحركات ضد الانجليز وكانت ريا وسكينة بيناضلوا ضد الانجليز مع زوج ريا وهو حسب الله سعيد وزوج سكينة محمد عبد العال واخران . وطبعا علشان يشغلوا الرأي العام عن الثورة ضد الانجليز كان لازم يبقى في قضية جديدة وغريبة تشغل الناس وترهبهم ويقال ان سكينة كانت مشتركة مع حركة ثورية سرية بقيادة عبد الرحمن باشا واتفتحت القضية بعدة بلاغات اتقدمت ضدهم وكان ماسك القضية يوزباشي اسمه ابراهيم حمدي وكان متعاون مع الانجليز ، واللي قام بالفعل بمداهمة عدة اماكن كانوا مأجرينهم من الباطن علشان اجتمعاتهم وعملياتهم ضد الانجليز وبالفعل تم العثور على عدد من الجثث الغير معروف هوياتهم وكانوا ١٧ جثة قيل انهم سيدات ، اما الرأي الاخر بيقول انهم كانوا لضباط وعساكر انجليز وواحدة من بائعات الهوى .
وجدير بالذكر ان الجثث دي تم العثور عليهم بعد ترك ريا وسكينة للمكان المستأجر فاما كانوا فعلا هم العساكر والضباط الانجليز اللي استدرجوهم للمكان على انه مكان للدعارة وقتلوهم ، او انهم جثث تم وضعهم لاثبات التهمة عليهم !!
وبالفعل تم تلفيق القضية واتحكم عليهم بالعدام بعد فقرة الدستور اللي كان بينص على عدم اعدام السيدات واتعدموا في اوائل عشرينيات القرن الفائت ، وطبعا اوراق القضية كان فيها مغالطات ومضاربات كتيرة حاول احد الضباط كشفها لكنه اتقتل .
ودلوقتي وبعد حوالي ١٠٠ سنة فتح الكاتب المصري احمد عاشور هذا الجدل مرة تانية كتب فيلم اسمه ( براءة ريا وسكينة ) واللي بيكشف فيه عن ملابسات القضية وبيعرض الرأي المخالف لانهم كانوا سفاحين وانهم كان بيناضلوا ضد الانجليز .
في برضه مسلسل اسمه ( اهو ده اللي صار ) اتعرض على التليفزيون المصري وبيعرض جانب صغير من الحقيقة دي ! .
وفي النهاية ده عرض لوجهتين النظر المتعارضتين واكيد بمرور الزمن هاتنكشف الحقيقة .
ده مجرد رأي والله اعلم .
انتهى ،،،
جيد ولكن معلومات مش اكيدة ، ياريت تقولوا مصادر المعلومات دي
ردحذفممتاز
ردحذف